پاکستانی سفیر کی نیو جرسی میں پاکستان ڈے پریڈ میں شرکت

 

نیویارک: 25 اگست، 2025

امریکہ میں پاکستان کے سفیر جناب رضوان سعید شیخ نے نیویارک میں پاکستان کے قونصل جنرل جناب عامر احمد اتوزئی کے ہمراہ نیو جرسی میں پاکستانی نژاد امریکی کمیونٹی کی جانب سے منعقدہ پاکستان ڈے پریڈ میں شرکت کی۔ اس سالانہ تقریب میں پاکستانی امریکیوں کے ساتھ ساتھ دیگر کمیونٹی کے افراد نے بھی بڑی تعداد میں شرکت کی اور اس موقع پر پاکستانی ثقافت کے رنگا رنگ مظاہرے پیش کیے گئے۔

پریڈ میں پاکستان کے متنوع ثقافتی ورثے، دستکاریوں اور روایتی کھانوں کے اسٹالز لگائے گئے، جبکہ قومی نغموں اور فنکاروں کی پرفارمنسز نے تقریب کو مزید پرجوش بنا دیا۔ شرکاء نے جوش و جذبے سے پاکستان کی آزادی کا جشن منایا۔

تقریب سے خطاب کرتے ہوئے سفیر رضوان سعید شیخ نے یومِ آزادی پاکستان کی اہمیت کو اجاگر کیا اور اسے قوم کی تاریخ کا قابلِ فخر سنگِ میل قرار دیا۔ انہوں نے کہا کہ اس سال کی تقریبات کو "بنیان المرسوس" میں پاکستان کی حالیہ کامیابی نے مزید خوشیوں میں بدل دیا ہے، جس نے قوم کو یکجہتی کے رشتے میں باندھ دیا ہے۔

سفیر نے پاکستانی نژاد امریکی کمیونٹی کی خدمات کو سراہا اور کہا کہ ان کا امریکہ کی ترقی و خوشحالی میں کردار پاکستان کے لیے باعثِ فخر ہے۔ انہوں نے کمیونٹی پر زور دیا کہ وہ اپنے نئے وطن کی سماجی، جمہوری اور شہری سرگرمیوں میں بھرپور حصہ لیں، تاکہ ایک مثبت کردار ادا کر سکیں۔

اس موقع پر سفیر نے امریکہ میں ہونے والے "Amerigol Latam Ice Hockey Tournament" میں پاکستانی آئس ہاکی ٹیم کی شاندار کارکردگی کو بھی سراہا، جس نے پاکستان کے نوجوان ٹیلنٹ کو عالمی سطح پر روشناس کرایا۔تقریب کا اختتام پاکستان اور امریکہ میں مقیم پاکستانی کمیونٹی کے درمیان مضبوط رشتے کے اعادے اور ثقافتی ہم آہنگی و قومی فخر کو فروغ دینے کے عزم کے ساتھ ہوا۔