دہشت گردی کا مکمل خاتمہ ریاست کی اولین ترجیح ہے: وزیراعظم شہباز شریف

 اسلام آباد (نامہ نگار خصوصی) — وزیراعظم محمد شہباز شریف نے کہا ہے کہ ریاست دہشت گردی کے مکمل خاتمے کے لیے پرعزم ہے اور فتنے الہند و فتنے الخوارج جیسے عناصر کو جڑ سے اکھاڑ پھینکنے کے لیے ایک جامع، مؤثر اور قابلِ عمل حکمتِ عملی پر تیزی سے عمل درآمد جاری ہے۔

وہ جمعرات کے روز وزیراعظم ہاؤس میں انسدادِ دہشت گردی اور ریاستی رٹ کے قیام سے متعلق اسٹیئرنگ کمیٹی کے اجلاس کی صدارت کر رہے تھے۔ اجلاس میں نائب وزیراعظم و وزیر خارجہ اسحاق ڈار، چیف آف آرمی اسٹاف فیلڈ مارشل سید عاصم منیر، مشیر قومی سلامتی لیفٹیننٹ جنرل (ر) محمد عاصم ملک، وزیراعظم کے معاون خصوصی رانا ثناء اللہ، وفاقی وزرا، چاروں صوبوں کے چیف سیکریٹریز، آئی جیز، اور دیگر اعلیٰ حکام شریک ہوئے۔

وزیراعظم نے کہا کہ حکومت نے دہشت گردی کے خاتمے کے لیے ایک کثیر الجہتی حکمتِ عملی اپنائی ہے، جس میں زمینی کارروائیاں، قانون سازی، انتہا پسندی کے نظریات کا سدباب، اور عوامی سطح پر شعور اجاگر کرنے جیسے اقدامات شامل ہیں۔انہوں نے واضح کیا کہ فتنہ الہند اور فتنہ الخوارج جیسے دہشت گرد گروہوں کے خلاف مکمل طاقت کے ساتھ کارروائیاں کی جا رہی ہیں اور یہ عناصر پاکستان کے امن، ترقی اور سالمیت کے دشمن ہیں۔ انہوں نے کہا کہ ریاست دہشت گردی کے خلاف بلا تفریق کارروائیاں جاری رکھے گی اور ان فتنوں کو جڑ سے اکھاڑ پھینکا جائے گا۔وزیراعظم نے کمیٹی کو ہدایت کی کہ وفاقی اور صوبائی حکومتوں کے درمیان مؤثر روابط کو یقینی بنایا جائے اور انسدادِ دہشت گردی سے متعلق تمام سفارشات پر مکمل عملدرآمد کیا جائے۔

انہوں نے قانون نافذ کرنے والے اداروں، وزارت داخلہ، انٹیلیجنس بیورو، اور صوبائی حکومتوں کے کردار کو سراہتے ہوئے کہا کہ ان کی مربوط کوششوں سے نہ صرف دہشت گردوں کے خلاف اہم کامیابیاں حاصل ہوئیں بلکہ اسمگلنگ کے خلاف مؤثر کارروائیاں بھی ممکن ہوئیں، جن کے نتیجے میں معیشت پر مثبت اثرات مرتب ہوئے۔وزیراعظم نے کہا کہ ملک میں امن و امان کے قیام سے ہی بین الاقوامی سرمایہ کاروں کا اعتماد بحال ہو سکتا ہے۔ اس سلسلے میں حکومت نے نظام کی ڈیجیٹائزیشن، ٹیکس اصلاحات اور شفافیت کو یقینی بنایا ہے۔انہوں نے بتایا کہ پاکستان اسٹاک ایکسچینج میں ریکارڈ بہتری اور عالمی مالیاتی درجہ بندی میں اضافہ، ملکی معیشت کے استحکام کا مظہر ہے اور اس سے غیر ملکی سرمایہ کاری میں اضافے کی راہ ہموار ہو رہی ہے۔وزیراعظم نے مزید کہا کہ ملک میں غیر قانونی مقیم افغان شہریوں کی واپسی کا عمل بھی عالمی قوانین کے مطابق جاری ہے اور اسے منظم انداز میں مکمل کیا جا رہا ہے۔

فوج کی جانب سے عزم کی تجدید

اس سے قبل چیف آف آرمی اسٹاف فیلڈ مارشل سید عاصم منیر نے بلوچستان میں منعقدہ 16ویں نیشنل ورکشاپ سے خطاب کرتے ہوئے کہا کہ پاک فوج ملک سے دہشت گردی کے مکمل خاتمے اور بلوچستان کی سماجی و اقتصادی ترقی کے لیے بھرپور عزم کے ساتھ مصروفِ عمل ہے۔آئی ایس پی آر کے مطابق، آرمی چیف نے قومی یکجہتی اور ہم آہنگی کے فروغ کے لیے بلوچستان کی ترقی کو ناگزیر قرار دیا اور کہا کہ دہشت گردی کے خلاف جدوجہد میں فوج ہر محاذ پر اپنی ذمے داری نبھا رہی ہے۔

دہشت گردی میں حالیہ اضافہ

واضح رہے کہ نومبر 2022 میں کالعدم تحریکِ طالبان پاکستان (TTP) کی جانب سے حکومت کے ساتھ جنگ بندی ختم کیے جانے کے بعد خیبر پختونخوا اور بلوچستان میں دہشت گردی کے واقعات میں تیزی سے اضافہ دیکھنے میں آیا ہے۔ حکومت نے اس کے جواب میں TTP کو "فتنہ الخوارج" اور بلوچستان میں بھارت کے مبینہ حمایت یافتہ گروپوں کو "فتنہ الہند" قرار دیا ہے۔حکام کے مطابق، ان اصطلاحات کا مقصد عوامی سطح پر ان گروہوں کی نظریاتی گمراہی اور بیرونی حمایت کو اجاگر کرنا ہے، تاکہ قومی بیانیے کو تقویت دی جا سکے۔