وزیراعظم شہباز شریف اور روسی صدر پیوٹن کے درمیان اگلے ہفتے ملاقات طے

 

اسلام آباد (مانیٹرنگ ڈیسک) — وزیراعظم شہباز شریف اور روسی صدر ولادیمیر پیوٹن کے درمیان اگلے ہفتے اہم ملاقات متوقع ہے، جو چین میں شنگھائی تعاون تنظیم (SCO) کے سالانہ اجلاس کے موقع پر سائیڈ لائن پر ہوگی۔

حکومتی ذرائع کے مطابق، اس ملاقات میں پاک-روس دوطرفہ تعلقات کو مزید مضبوط بنانے، خطے کی سلامتی، اقتصادی تعاون اور عالمی امور پر تفصیلی بات چیت ہوگی۔

ذرائع کے مطابق، وزیراعظم شہباز شریف کی SCO اجلاس کے دوران دیگر عالمی رہنماؤں سے بھی اہم ملاقاتیں طے پا گئی ہیں، جن میں چینی صدر شی جن پنگ، ترک صدر رجب طیب اردوان، آذربائیجان کے صدر الہام علیوف اور دیگر نمایاں شخصیات شامل ہیں۔

واضح رہے کہ وزیراعظم شہباز شریف 30 اگست کو چین روانہ ہوں گے، جہاں وہ شنگھائی تعاون تنظیم کے سربراہی اجلاس میں پاکستان کی نمائندگی کریں گے۔