اسلام آباد (نمائندہ خصوصی)
وفاقی دارالحکومت اسلام آباد کے علاقے سپر مارکیٹ چوک پر بلوچ خواتین کا احتجاج گزشتہ دو ماہ سے جاری ہے، تاہم ضلعی انتظامیہ کی جانب سے احتجاج کے حل کی بجائے سیکیورٹی کے نام پر اہم شاہراہیں اور داخلی راستے بند کر دیے گئے ہیں۔ چائنا چوک سے سپر مارکیٹ تک جانے والے مرکزی راستے پر خار دار تاریں لگا کر مکمل بند کیا جا چکا ہے، جب کہ نیشنل پریس کلب کے مین گیٹ کو بھی دو مختلف مقامات سے بند کر دیا گیا ہے، جس سے صحافیوں، شہریوں اور مقامی تاجروں کو شدید مشکلات کا سامنا ہے۔
احتجاجی مقام کے گرد سیکیورٹی سخت کر دی گئی ہے، تاہم اس سختی کا خمیازہ عوام اور میڈیا نمائندوں کو بھگتنا پڑ رہا ہے۔ نیشنل پریس کلب اسلام آباد آنے والے صحافیوں، مہمانوں، اور پریس کانفرنس میں شرکت کے لیے آنے والے افراد کو متبادل، غیر محفوظ اور طویل راستے اختیار کرنے پڑ رہے ہیں، جس سے ان کے وقت اور تحفظ دونوں متاثر ہو رہے ہیں۔
قریبی پی ایس او پیٹرول پمپ بھی ان غیر اعلانیہ بندشوں کا شکار ہو چکا ہے۔ پمپ تک عام رسائی ممکن نہ ہونے کے باعث اس کا کاروبار تقریباً مکمل طور پر ٹھپ ہو گیا ہے، جس سے روزانہ لاکھوں روپے کا نقصان ہو رہا ہے۔ وہاں کام کرنے والے متعدد ملازمین کی نوکریاں بھی خطرے میں پڑ گئی ہیں۔شہریوں کا کہنا ہے کہ انتظامیہ کی طرف سے راستوں کو خار دار تاروں سے بند کرنا، عام آمد و رفت کو روک دینا، اور نیشنل پریس کلب جیسے اہم ادارے کی رسائی میں رکاوٹ ڈالنا نہ صرف ناقابلِ فہم ہے بلکہ یہ آئینی حقوق کی خلاف ورزی کے مترادف ہے۔
شہری و صحافتی حلقوں نے مطالبہ کیا ہے کہ احتجاج کے مسئلے کو سنجیدگی سے لیا جائے، مظاہرین کے ساتھ بامعنی اور نتیجہ خیز مذاکرات کیے جائیں، اور شہریوں کی زندگی کو معمول پر لانے کے لیے بند راستے فی الفور کھولے جائیں۔
چائینا چوک کے طرف سے پریس کلب کی جانب جانے والا راستہ