سندھ کے اسپتال پاکستانیوں سمیت غیرملکیوں کے لیے بھی مفت، شرجیل میمن

 

کراچی سندھ کے سینئر صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ سندھ کے تمام سرکاری اسپتالوں میں پاکستانیوں سمیت ایران، افغانستان اور دیگر ممالک سے آئے مریضوں کو بھی مفت علاج کی سہولیات فراہم کی جا رہی ہیں۔

یہ بات انہوں نے پاکستان فیڈرل یونین آف جرنلسٹس (PFUJ) کے اعزاز میں کراچی کے مقامی ہوٹل میں دی گئی ظہرانے کی تقریب میں کہی، جس میں سندھ کے وزرا، پیپلز پارٹی کے رہنما اور ملک بھر سے آئے سینئر صحافیوں نے شرکت کی۔

صحافیوں کو تحفظ اور سہولیات کی یقین دہانی

تقریب سے خطاب کرتے ہوئے شرجیل میمن نے کہا کہ سندھ حکومت صحافیوں کے تحفظ، فلاح و بہبود اور آزادی اظہار کے اصولوں پر کاربند ہے۔
انہوں نے واضح کیا کہ صحافیوں کے لیے کم از کم اجرت کے قانون پر عمل درآمد حکومت کی اولین ترجیح ہے۔

میڈیا اور مزدور دوست پالیسیاں

شرجیل میمن نے کہا کہ پیپلز پارٹی نے ہمیشہ مزدوروں اور میڈیا ورکرز کی آواز بلند کی ہے اور سندھ میں 93 ہزار ملازمتیں شفاف طریقے سے دی گئیں۔انہوں نے بتایا کہ سندھ میں 21 لاکھ گھروں پر مشتمل دنیا کا سب سے بڑا ہاؤسنگ پروجیکٹ جاری ہے

پنجاب، خیبرپختونخوا، بلوچستان کے صحافیوں کی شرکت

تقریب میں ملک بھر سے آئے صحافیوں نے سندھ کے شعبہ صحت کی کارکردگی کو سراہا، خاص طور پر کینسر کے مفت علاج کے لیے سائبر نائف ٹیکنالوجی اور تھر میں بنیادی سہولیات کی فراہمی کو قابل تعریف قرار دیا۔وزیر بلدیات سعید غنی نے کہا کہ صحافت اور عدلیہ کے بغیر جمہوریت مکمل نہیں ہو سکتی۔رضا ہارون نے زور دیا کہ صحافت کو ذمہ داری کے ساتھ ادا کیا جائے۔صدر PFUJ افضل بٹ اور جنرل سیکریٹری ارشد انصاری نے سندھ حکومت کی پالیسیوں کو سراہا اور بین الصوبائی صحافتی تبادلوں کی تجویز دی۔آخر میں، شرجیل میمن نے مہمانوں کو اجرک، سندھی ٹوپی اور اعزازی شیلڈز پیش کیں۔