مقبوضہ بیت المقدس:
اسرائیل کے وزیرِ قومی سلامتی ایتامر بین گویر نے اتوار کے روز مسجدِ اقصیٰ کے احاطے میں داخل ہو کر یہودی مذہبی عبادت ادا کی، جسے دنیا بھر میں مسلمانوں نے ایک سنگین اشتعال انگیزی قرار دیا ہے۔ یہ دورہ نہ صرف عشروں پرانے "اسٹیٹس کو" معاہدے کی خلاف ورزی ہے بلکہ خطے میں کشیدگی کو مزید ہوا دینے کا باعث بھی بن رہا ہے۔بین گویر کی جانب سے کیے گئے اس اقدام کی ویڈیوز اور تصاویر میں دیکھا جا سکتا ہے کہ وہ مسجدِ اقصیٰ کے احاطے میں مذہبی دعائیں کر رہے ہیں۔ یہ مقام، جسے یہودی "ٹیمپل ماؤنٹ" کہتے ہیں، اسلامی عقیدے میں قبلہ اول اور تیسرا مقدس ترین مقام ہے۔
