وزیر اعلیٰ خیبرپختونخوا سہیل آفریدی کی آمد سے قبل کراچی ایئر پورٹ پر پی ٹی آئی کارکنان آپس میں لڑ پڑے

کراچی: وزیر اعلیٰ خیبرپختونخوا سہیل آفریدی کی آمد سے قبل کراچی ایئرپورٹ پر پاکستان تحریک انصاف (پی ٹی آئی) کے کارکنان آپس میں الجھ پڑے۔ استقبال کے لیے جمع ہونے والے کارکنان کے درمیان تلخ کلامی ہاتھا پائی میں تبدیل ہو گئی اور کارکنان نے ایک دوسرے کو تھپڑ رسید کیے۔

عینی شاہدین کے مطابق واقعہ اس وقت پیش آیا جب وزیر اعلیٰ خیبرپختونخوا سہیل آفریدی کی پرواز کی آمد کا وقت قریب تھا۔ بتایا گیا ہے کہ وزیراعلیٰ کی فلائٹ دو بجے کراچی ایئرپورٹ پہنچنا تھی، جس کے پیش نظر پی ٹی آئی کے متعدد کارکن استقبال کے لیے پہلے ہی ایئرپورٹ پر موجود تھے۔

جھگڑے کے باعث ایئرپورٹ کے احاطے میں کچھ دیر کے لیے کشیدگی پیدا ہو گئی، تاہم بعد ازاں صورتحال قابو میں آ گئی۔ واقعے کے بعد انتظامیہ اور سیکیورٹی اہلکاروں نے مداخلت کر کے کارکنان کو منتشر کیاتاحال جھگڑے کی وجوہات سامنے نہیں آ سکیں، جبکہ پی ٹی آئی کی جانب سے اس حوالے سے کوئی باضابطہ مؤقف جاری نہیں کیا گیا