ایران کا لبنان میں اسرائیلی فوجی کارروائیوں پر شدید ردعمل، علاقائی استحکام کو خطرہ قرار دے دیا

 اسرائیلی حملوں سے جانی و مالی نقصان پر تشویش، کشیدگی میں اضافے کے سنگین نتائج کی تنبیہ

بیروت: ایران نے لبنان کے مختلف علاقوں میں اسرائیلی فوج کی جانب سے کی جانے والی کارروائیوں کی سخت مذمت کرتے ہوئے خبردار کیا ہے کہ ایسے اقدامات مشرق وسطیٰ میں امن و استحکام کے لیے سنگین خطرات پیدا کر سکتے ہیں۔

ایرانی خبر رساں ادارے کے مطابق وزارت خارجہ کے ترجمان اسماعیل بقائی نے اپنے بیان میں کہا کہ لبنان پر ہونے والے حالیہ حملوں کے نتیجے میں متعدد شہری جاں بحق اور زخمی ہوئے ہیں، جبکہ مختلف تنصیبات اور بنیادی ڈھانچے کو بھی بھاری نقصان پہنچا ہے۔

انہوں نے کہا کہ اسرائیل کی مسلسل جارحانہ پالیسی اور کشیدگی میں اضافہ خطے کے امن و سلامتی پر منفی اثرات مرتب کر رہا ہے۔ ان کے بقول ایسے اقدامات نہ صرف موجودہ صورتحال کو مزید پیچیدہ بنا سکتے ہیں بلکہ پورے خطے کے استحکام کو بھی متاثر کر سکتے ہیں۔

ترجمان نے عالمی برادری سے مطالبہ کیا کہ وہ خطے میں بڑھتی ہوئی کشیدگی کو روکنے اور شہریآبادی کے تحفظ کے لیے مؤثر کردار ادا کرے۔